الرئيسية / أندرويد / أفضل تطبيقات تعديل و تحرير الڤيديوهات للأندرويد

أفضل تطبيقات تعديل و تحرير الڤيديوهات للأندرويد

نقدرو نشبّهو تحرير الڤيديوهات بالطبخ، بحيث خاصك الأدوات المناسبة باش تحصل فالآخر على نتيجة مزيانة. نفس الشيء بالنسبة لتعديل الڤيديوهات على هواتف أندرويد. شحال هادي كان المهمّة صعيبة و كايخصك جهاز دو مواصفات عاليّة و خِبرة باش تقدر تحرّر ڤيديو ولكن دبا الوقت تطوّرات. و غي بهاد الماكينات (هواتف اندرويد) لي عندنا ليوم فيدّينا و بمساعدة تطبيقات لي انهدرو عليهم ليوم فهاد المقال، نقدرو نعدّلو و نحررّو الڤيديوهات ديالنا بسهولة.

أفضل 5 تطبيقات لتعديل و تحرير الڤيديوهات للأندرويد

هواتف الاندرويد الحديثة صبحت مجهزّة بكاميرات لي كاتصوّر بجودة جد عاليّة. ولكن باش تحصل فالاخر على ڤيديو مزيان خاصك ضروري تعدّل عليهم. هادي لائحة ديال أحسن التطبيقات لي اتساعدك باش تنجز هاد المُهمّة.

Adobe Premiere Clip

التطبيق معروف عند المستعملين ديال الويندووز و حتى الماك. بحيث كايتوفّر على مجموعة من الميزات، من بينها التعديل الأوطوماتيكي لي كاتختار فيه الصوّر و الڤيديوهات ديالك و كاتخلّي التطبيق يتكلّف بالباقي إلا كنتي معڭاز. أما إلا كنتي من النوع لي عزيز عليه يدير الخدمة على طريقتو، فالتطبيق كايوفّر ليك مجموعة من الأدوات مثل إضافة تأثيرات و موسيقى فالخلفيّة. التطبيق يستاهل تجربة، خصوصا إلا كنتي من المستعملين ديالو على الحاسوب.

KineMaster 

واحد من التطبيقات الشاملة فمجال التعديل على الڤيديوهات لي كاينا فمتجر Google Play إلا ماكانش الأفضل. بمساعدة هاد التطبيق تقدر تحصل على مونطاج إحترافي للصوّر و الڤيديوهات ديالك.

التطبيق كايتوفّر على واجهة إستعمال بسيطة و فعّالة. بحيث كايمكنك من إضافة تأثيرات و transitions و كتابات متحرّكة و العديد من الأشياء. كذلك كايتوف على خاصيّة التعليق على الڤيديو. تقدر تلقى صعوبة باش تعلّم ليه فالأوّل، ولكن الميزات لي فيه صعيب باش تلقاهم فتطبيق آخر.

VivaVideo

تطبيق سهل و بسيط الإستعمال، التطبيق كايستعمل أسلوب القصة المصوّرة لي كايمكنك من إضافة الصور و الفيديوهات ديالك و تعدّل عليهم كيف بغيتي. VivaVedio كايتوفّر على العديد من الفلترات و التأثيرات و خاصيّة إضافة الكتابة و ميزة الـ SlowMotion.

التطبيق محدود من ناحيّة الميزات إلا قارناه بالتطبيقات لي دكرنا من قبل. ولكن سهولة الإستعمال ديالو هي لي كاتميّزو عليهم و كاتخلّيه ينافسهم.

PowerDirector Video Editing

التطبيق من تطوير شركة Cyberlink لي عاندها وزن فهاد المجال، الشركة هي نفسها لي طوّرت برنامج PowerDVD لمستعملي ويندووز. مثل KineMaster، واجهة الإستعمال ديال PowerDirector كاتمزج بين الآناقة و سهولة الاستخدام. كذلك التطبيق كايتوفّر على تأثيرات و transitions لي تقدر تضيفهم للڤيديو ديالك، بالإضافة لأنه كايمكنك باش تحرر ڤيديوهات بدقّة 720 پيكسيل. التطبيق كايتطب شويّة الخبرة و الصبر و لكن ساهل باش تتقنو. كما ان النتائج ديالو ماكاتخيّبش الظن.

VideoShow

واحد من أفضل التطبيقات لي كاينا فالسوق. التطبيق ماكيتقارنش مع KineMaster و PowerDirector، ولكن اللائحة ديال الميزات لي كايوفّر طويلة. بالإضافة للأشياء الأساسية، غاتقدر -بمساعدة VideoShow- تضيف تأثيرات كثير للڤيديوهات ديالك. هادشي كايتضمن stickers، كتابة بخطوط مختالفة، ثيمات و ميزة الرسم و التعليق على الڤيديو.

تقدر تلقى صعوبة باش تتحكّم فالأدوات ديال التطبيق. لكن مع الميزات لي كايوفّ، كايستاهل تجرّبو.