الرئيسية / أندرويد / كيفاش تتخلّص تلقائيا من صور واطساب اللي تاتعمّر الذاكرة ديال تليفونك؟‎

كيفاش تتخلّص تلقائيا من صور واطساب اللي تاتعمّر الذاكرة ديال تليفونك؟‎

تطبيق Whatsapp أصبح جزأ أساسي من الحياة اليوميّة لمستعملي الهواتف الذكيّة، لدرجة وصل عدد المستعملين ديالو بشكل يومي لأكثر من مليار مستعمل عبر العالم. هادشي راجع لأنه تطبيق مجّاني و للخاصيّات لي كايمنح، مثل مكالمات الصوت و الڤيديو المجانيّة. لكن هاد الإجابيات كايجي معاهم سلبيات، و اكثر مشكل كايعانيو منو مستعملي تطبيق واتساپ هوا استهلاك مساحة كبيرة للذاكرة الداخلية للهاتف. هادشي راجع لكثرة الصور و الڤيديوهوات لي كانتوصّلو بيها و لّي الأغلبية ديالها كاتكون غير مهمّة. الطريقة العاديّة باش نتخلصو منهم هيّ ندخلو لـGallery ديال الهاتف و نمسحو الصوّر بشكل يدوي ولكن هاد الطريقة جد متعبة و كاتاخد وقت. لكن فهاد الشرح أنستعملو طريقة كاتخلّينا نتخلّصو من هاد الصوّر و الڤيديوهات الغير مفيدة لينا بشكل أوتوماتيكي.

كيفاش تتخلّص تلقائيا من صور واطساب اللي تاتعمّر الذاكرة ديال تليفونك

فهاد الشرح أنستعملو تطبيق Magic cleaner لي هوا من برمجة فريق هندي (Siftr) و لّي تبث الكفاءة ديالو لا على هواتف الأندرويد ولا حتى هواتف الآيفون. طريقة عمل التطبيق جد سهلة و كاتعتامد على خوارزميات لي كاتقدر تدير فحص للصوّر لي فالهاتف و تحدد لينا المهمّة منها و الغير مهمّة، و هادشي كامل طبعا بشكل اوطوماتيكي و بلا حتى تدخل من المستعمل.

تطبيق Magic Cleaner تايسكاني الملف ديال الميديا اللي كاين فتطبيق واطساب وتيحدد أوتوماتيكيا كل كل الصور اللي خاصها تمحى بحال السكرينشوتات، والmemes و باقي الصور من هاد النوع. من بعد عندك إمكانية التخلص من هاد الصور بضغطة زر واحدة. تخيل شحال أتكون هاد القضية مفيدة للناس اللي عندهوم الآلاف ديال الصور فتيليفوناتهوم.

التطبيق بطبيعة الحال باش يكون فالمستوى المطلوب يعتمد على محرك تيخدم تقريبا بحال Cloud vision واحد التقنية ديال الذكاء الاصطناعي تاتستعملها غوغل باش تعرف شنو كاين فالصور. هادشي علاش هاد التطبيق تايتطلب انترنت باش يخدم لانه يعتمد على سرفرات خارجية ماشي قوة السمارتفون ديالك. الا كنتي ف4G/3G ما عندك مناش تخاف، التطبيق ما غاديش يأثر على الاستهلاك ديالك، لانه تيرفع غير جزء من الصورة (hash) وتيعمل مقارنة مع البيانات اللي عندهوم.

إسم التطبيق كيفما قلنا هوا Magic cleaner متوفّر لمستعملي أندرويد و حتى آيفون، و لّي تبث كفاءة كبيرة من بعد تجربتي ليه. كايبقى العيب الوحيد ديالو هو رغم انه مجاني إلا أنّه كايعطيك رقم محدود ديال الصوّر لي تقدر تمسح، و كايفرض عليك ترسل دعوّة للأصدقاء يستعملو التطبيق باش تقدر تكمّل إستعمال التطبيق أو تصبر مدّة ديال الوقت، شخصياً كانفضل الإختيار الثاني. أيضا التطبيق كايحتاج الآنترنيت باش تقدر تستعملو، رغم هاد العيوب إلا أن التطبيق يستاهل نظرا للخِدمة لي كايمنح.

فحالة كنتي كاتستعمل تطبيق واطساب بشكل يومي فراه حتما خاص الهاتف ديالك يتوفّر على تطبيق Magic cleaner. إلا نفعك هاد المقال ماتنساش تپارطاجيه مع صحابك و إلا كانت عندك شي طريقة أخرى ماتعڭزش باش تپارطاجيها معانا فتعليق.