الرئيسية / الويب / مهندس صيني ختارع زوجة آلية “روبوت” و تزوج بيها

مهندس صيني ختارع زوجة آلية “روبوت” و تزوج بيها

المهندس الصيني سميتو Zheng Jiajia و عندو 31 سنة متخصص فالذكاء الإصطناعي و تطوير الروبوتات، ختارع روبو لي سمّاها Yingying و تزوّج بيها. بحيث هاد الروبو كاتقدر تجاوب و تتكلم ببعض الجُمل كيفما زوّدها بخاصيّة التعرف على الوجوه و الصوّر.

القصة :

المهندس سابقا كان خدام عند شركة هواوي فين كانت عندو وَحدة متخصصة فالذكاء الإصطناعي و هيّ فين غايطوّر لخدمة ديالو. من بعد المهندس الصيني غايبدا مشروع خاص بيه و لّي سماه عقل الأشياء، كيفما خدّم معاه الزوجة ديالو (الرّوبو) و عطاها منصب المتحدثة بإسم الشركة.

Zheng صرّح للقنوات المحليّة بلّي ناوي يطوّر مزال الزوجة ديالو باش تقدر تمشي و تدير بعض المهام المنزليّة.

العرس ديال الزوجين تقام فالمدينة ديالو و حضرو ليه لواليدين ديال المهندس و العديد من الأصدقاء، و المراسم دازو بشكل عادي بحيث الرأس ديال الزوجة تغطّى بوشاح احمر كيفما ولّفو يديرو فالطقوس ديالهم.

يقدر يكون هادشي كامل غي buzz باش يقدر يروّج و يدير اشهار للشركة الخاصة ديالو، مع دلك المهندس فالتصريح ديالو فالمقابلة لي دار مع Pear Video بان عليه ناوي لمعقول و ڭال: “أخيرا قدرت نحقق الحلم و ندير زوجة بالمواصفات لي بغيت انا. و مستقبلا بغيت نشوف روبو فكل دار”.